Jose Pidal Next?

MAGIGING MATAGAL pa ang usapin tungkol sa pangyayari kahapon. Marami pang kuro-kuro, opinyon at sariling pananaw (di ba pare-pareho lang yun?) ang masasabi at maisusulat tungkol sa resulta ng kaso ni dating presidente Erap Estrada.

May mga nagsasabing naaawa sila kay Erap. Hindi ko nasubaybayan ang anim na taong tinakbo ng paglilitis sa Sandiganbayan subalit sa tingin ko lang, guilty talaga si Erap sa pagpapayaman niya ng sarili. Likas na sa ating mga Filipino ang ugaling maawain lalo na sa mga malalaking personalidad. Marami ang nagsasabing ibalik na lang nya ang mga yamang kinuha nya at pwede na siyang makalaya, quits na. Para sa akin, mahirap kaawaan ang isang taong may P3.2 BILLION sa Jose Velarde account nya sa PCI-Equitable bank. Nakapamuhay siya at ang kanyang pamilya ng magara dahil sa mga perang ito. Naging pabaya sya, nahuli siya kaya sorry na lang. History na ang maghuhusga sa kanya balang araw. Nakakaawa kung wala talaga siyang kasalanan pero ayon sa mga nababasa natin at sa kinalabasan ng kaso, guilty talaga.

Madami din ang nagbubunyi (lalo na sa Malakanyang) at sinasabing nagpapatunay lang ito sa katatagan at maturity ng ating justice system, na sinasabing dapat tayong maging proud dahil napatunayan daw natin sa buong mundo na kaya nating mag-convict ng isang dating presidente sa isang criminal offense.

Duh!

Eh ano ng nangyari sa Jose Pidal case at sa iba pang kinasasangkutan ng Arroyo family? Sa kaso ni Hernani Perez na pagkatapos ng anim na taon ay nasa preliminary hearing pa lamang? Ni Jocjoc Bolante na sangkot sa fertilizer scam? Sa walang kamatayang Hello Garci? At ngayon nga ay sa mainit-init pang $329-million National Broadband Network deal with China’s ZTE Corp., na sinasabing overpriced dahil malaki ang komisyon ni Comelec chair Benjamin Abalos ayon na rin sa pagbubulgar ng anak ni House Speaker JDV. Eh ang maanomalyang $460-million Cyber Education Program? Dahil ba malapit sila sa palasyo?

Imbis na linawin ang mga bagay na ito, ang sagot ng Malakanyang ay ang illegal na EO 464 na naglalayong pigilan ang mga matataas na opisyal ng Malakanyang at ng military na pumunta sa mga Senate inquiries kung walang pahintulot ng presidente, na naglalayon sanang bigyang linaw ang mga bagay na ito.

Oo nga, na-convict natin si Erap pero masasabi lamang nating matatag nga ang justice system kapag hindi lamang ang mga kalaban ng gobyerno ang ating naipakulong, maging yung nasa loob at paligid sana ng Malakanyang.

Dahil kung ating susuruin, ano ang pagkakaiba ni Jose Velarde kay Jose Pidal?